«Barselona» sobiq prezidenti Xosep Mariya Bartomeu klubning Lionel Messi bilan tuzgan shartnomasidagi ma’lumotlar internetda tarqalgani haqidagi xabarlarga munosabat bildirdi. «Bu juda ham jiddiy masala. Professional shartnomalarni ommaga oshkor qilinishi –qonunga zid. Televizorga chiqib olib kimnidir ayblash oson, ammo bu hazil qilinadigan masala emas. Bu ish sudgacha yetib borishi aniq. Leo ishlab topayotgan pulini oqlamoqda. Pandemiya yuzaga kelmaganida Messini maoshini to‘lash «Barselona»ga qiyinchilik tug‘dirmasdi», — deya Bartomeuning so‘zlarini keltirmoqda Marca. Avvalroq, Messining qancha maosh olayotgani va shartnomadagi shartlari haqidagi ma’lumotlarga futbolchidan tashqari, faqatgina klubning uch nafar vakili – sobiq prezident Bartomeu, ijrochi direktor Oskar Grau va klub prezidenti vazifasini bajaruvchi Karles Tuskets xabardor ekani va Messi tomoni aynan ularni ustidan sudga murojaat qilmoqchi ekanligi xabar qilingandi. Eslatib o‘tamiz, Ispaniyaning El Mundo gazetasi tarqatgan Messi hamda «Barselona» o‘rtasida imzolangan deya ta’kidlagan shartnomada yozilishicha, 2017 yilda imzolangan 4 yillik kelishuvga ko‘ra, Messi maksimum 555 million 237 ming 619 yevro maosh olishi mumkinligi ko‘rsatilgan. Bu dollarda 674 millionga yaqin pul degani. Ko‘rsatilgan summada bonuslar ham ko‘zda tutilgan. Manba tribuna.uz