Messi va «Barselona» o‘rtasidagi yarim milliardlik shartnomani ochiqlagan El Mundo futbol olamida katta «bombani portlatdi». Dam olish kunlarida tarqalgan shov-shuv 2017 yilning noyabrida Messi klub bilan imzolagan shartnoma haqida bo‘lib, bu kelishuvga ko‘ra, futbolchi 2021 yilning iyun oyigacha 555 million yevro olishi belgilangan. Shundan 138 million yevro – maosh (bonuslar bilan birgalikda), 115 million yevro – yangi shartnomaga imzo qo‘ygani uchun mukofot puli va yana agar shartnoma yakunigacha u «Kamp Nou»ni tark etmasa, sadoqat uchun yana 78 million yevro. Raqamlar ancha umumlashtirilgan, masalan, soliqlar ushlab qolinishi ham bor, ammo bu kartinani o‘zgartirmaydi. Bu summaning hammasi Messiga yetib bormasa-da, yaqinda 1,2 milliard qarzi borligini e’lon qilgan «Barselona»ning cho‘ntagidan chiqadi. Goldman Sachs kabi kompaniyalarga bo‘lgan kreditlardan tashqari, klub «Liverpul» va «Ayaks»ga Koutino va Frenki De Yong uchun transfer summasini to‘lab qo‘yishi ham kerak. Bu xabarning oshkor etilishi vaqti ham ayni muddao. Pandemiya tufayli prezident saylovlarining kechikishi, klubning iqtisodiy tanazzulga uchrayotgani haqidagi faktlar bilan birgalikda, mana shu shartnoma ommaga chiqib ketdi. Marca nashri shartnomaning chiqib ketishi sobiq prezident Bartomeu yoki sobiq bosh direktor Grau, balki hatto vaqtinchalik komissiya raisi Tuskets bo‘lishi mumkinligini yozdi. Ammo aslida bu voqeaga nomzodlar ham daxldor bo‘lish ehtimoli mavjud. Ular uch kishi – Laporta, Font va Freysha. Ularning qaysi biri yakunda g‘olib chiqsa ham, klubni iqtisodiy inqirozdan qutqarishdan tashqari, Messi bilan yangi shartnoma borasida og‘ir muzokaralarni o‘tkazishi kerak bo‘ladi. «Kamp Nou»da boshqa variant ko‘rib chiqilmayapti ham. Ya’ni na Laporta, na Font va na Freysha saylovoldi dasturlarida Messini klubni tark etishi ehtimolini aytishga qo‘rqib turibdi. Messisiz yo‘lda davom etish g‘oyasi o‘ta tahlikali bo‘lib, bunday rejani birinchi bo‘lib tilga olgan nomzod, tabiiyki, mag‘lubiyatga uchraydi. Mana shu tarafdan, yuqoridagi shartnoma ulardan qisman bosimni olib tashlaydi. Mabodo, Leo baribir ham ketishni ixtiyor etsa, yangi prezident kamroq tanqidga uchraydi va hammasini qaytadan boshlash imkoniyatiga ega bo‘ladi. Messi bilan kelisha olmaslik, qimmatbaho shartnoma va iqtisodiy inqiroz fonida mantiqli ko‘rinadi. Muxlislar ham hatto tushunishlari mumkin bo‘ladi. Shu nuqtayi nazardan, Messining yirik shartnomasini ochiqlash, o‘sha shartnomani tuzgan sobiqlardan ko‘ra, yangi shartnoma bo‘yicha kelishish shart qilinayotgan yangilarning manfaatiga ko‘proq ishlaydigandek tuyulmoqda. Messining ketishi, ayniqsa, o‘sha shartnoma oshkor qilingach, yanada haqiqatga yaqinlashdi, chunki, futbolchi klub ichidagi «dushman»dan, ayniqsa, Messi katta pul uchun o‘ynaydigan inson sifatida namoyon qilingach, nafratlanadi, klubda qolish fikridan yanada uzoqlashadi. Aynan mana shu obrazning paydo qilingani Messining ko‘proq jahlini chiqarmoqda va u oxirigacha sudlashishga tayyorligini bildirdi. Qizig‘i, shartnoma shartlari haqidagi insayd chiqishidan bir necha soat oldin, xuddi shu gazeta Leodan iqtibos keltirgandi – «To‘g‘ri, pullar yaxshiroq yashash uchun sharoit yaratadi, ammo men uchun asosiysi bu emas. Meni ko‘proq «Barselona»da o‘ynash va sovrinlarni yutish to‘lqinlantiradi». Albatta, Messining ikkiyuzlamachi ekaniga ishonish qiyin, bu so‘zlar ham chin ko‘ngildan aytilganiga shubha yo‘q. Lekin yarim milliardlik shartnoma oshkor bo‘lar ekan, klub ramzi, tarixdagi eng buyuk futbolchi kabi baholar yarashmay qolayotgandek tuyulaveradi. Messini oqlash uchun ham asoslar yetarli. Moliyaviy tomondan olib qaraganda ham, aynan Leo «Barselona»ning media olamida jozibador qiluvchi muhim figura hisoblanadi. Maydondagi natijalar, klubning yangi shonli tarixi aynan Messi atrofida yaratilgani ham katta fakt. Sodda qilib aytganda, Leo klubga o‘sha shartnomada ko‘rsatilgan summalardan birmuncha ko‘proq pul ishlab berdi, to‘g‘ri. Ammo yana savol tug‘iladi, futbolchiga bo‘lgan mehrimizni bir chetga surib o‘ylab ko‘rsak, bularning hammasi unga klub iqtisodini xavf ostiga qo‘yish haqqini beradimi? Bir narsa shubhasiz – Messi «Barselona»dan kattaroq bo‘lishi mumkin emas. Lekin bu shartnomani bajaraman deb, klubning ba’zi futbolchilarni sotishga majbur bo‘lishi, maoshlarni qirqish va rejalaridan chetga chiqishi, buning aksini isbotlayotgandek. Shunday tuyuladiki, agar «Barselona» boshqaruvida Florentino Peres yoki unga o‘xshagan odam bo‘lganida, Leo allaqachon «PSJ» yoki «Manchester Siti»ga ketgan bo‘lardi. Peresni Ronaldu, Yerro yoki Kasilyasning sotib yuborilishida har qancha yomon ko‘rishimiz mumkin, lekin doim klub manfaatlarini yuqori qo‘yib kelgan. Shu tomondan olganda, El Mundo jurnalistlari biroz nohaq. Yo‘q, «Barselona»da iqtisodiy inqirozni Messi keltirib chiqarmayapti, balki klub manfaatlarini bir futbolchidan pasaytirib yuborgan Bartomeu, Grau yoki Tuskets kabi shaxsiyatlarning aybi kattaroqdir. Manba: tribuna.uz