Turkiya prezidenti Rajab Toyyib Erdo‘g‘an Jo Bayden tomonidan o‘zining rossiyalik hamkasbi Vladimir Putin haqidagi bildirgan fikrlari “qabul qilib bo‘lmaydigan” va AQSh prezidentiga mos kelmaydigan ish ekanini aytdi. Eslatib o‘tamiz, Bayden yaqinda bergan intervyusida Putinni “qotil” deb atagandi. Bu haqda 17 mart kuni Jo Baydenning jurnalistlarga bergan intervyusi e’lon qilindi. Unda AQSh prezidenti “Putinni qotil deb o‘ylaysizmi?” degan savolga “ha” deb javob berdi. Bu Moskva va Vashington o‘rtasidagi munosabatlarni yanada yomonlashtirdi. Shundan keyin Putin Baydenga javob qaytarib, kim uni qotil deb atagan bo‘lsa, o‘sha shaxsning o‘zi qotillik qilganini aytdi. «Janob Baydenning janob Putin haqidagi bayonotlari prezidentga mos keladigan so‘zlar emas. Rossiya kabi davlat prezidentiga qarshi bunday so‘zlarning ishlatilishi haqiqatan ham qabul qilinishi mumkin emas va bu jim qarab turiladigan narsa emas. Mening fikrimcha, janob Putin juda aqlli javob qaytarib, kerakli ishni amalga oshirdi” deydi Erdo‘g‘an. Liviya hamda Suriyada jang qilayotgan qarama-qarshi tomonlarni qo‘llab-quvvatlayotganlariga qaramay Turkiya va Rossiya o‘rtasidagi munosabatlar so‘nggi yillarda ancha qalinlashdi. Turkiya Rossiyadan qurollar sotib olmoqda. Turkiya prezidenti Erdo‘g‘an Putinni o‘zining do‘sti ekani ta’kidlaydi. Manba: aniq.uz