Tesla" Ilon Maskni sudga berdi. Sabab «tartibsiz» tvitlar

Tesla elektromobil kompaniyasining investori kompaniyaning asoschisi va bosh direktori va direktorlar kengashi ustidan Delaver shtati sudiga shikoyat arizasi kiritdi. Bu haqda Bloomberg nashriga tayanib, Meduza xabar berdi.
Da’vo Ilon Maskning Twitter ijtimoiy tarmog‘idagi, investorning fikriga ko‘ra, kompaniyani milliardlab dollarlik xavf-xatarga duchor qiladigan «tartibsiz» postlari sababli kiritildi. Investorning aytishicha, Mask o‘zining tvitlari orqali 2018 yilda AQShning qimmatli qog‘ozlar bo‘yicha komissiyasi (SEC) bilan tuzilgan shartnoma shartlarini buzmoqda. Unga ko‘ra, Mask birinchi navbatda ijtimoiy tarmoqlarda o‘z harakatlarini muvofiqlashtirishi kerak.
Da’vogarning fikriga ko‘ra, Maskning keyingi nazoratsiz tvitlari «kompaniyaning moliyaviy holatiga jiddiy ta’sir qilishi» va kompaniyada Maskka qarshi turishi hamda investorlarni himoya qilishi kerak bo‘lgan odamlarning ovozini «bosib qo‘yishi» mumkin. Da’vogar Tesla’ning direktorlar kengashini uning a’zolari Maskning SEC bitimi shartlarini bir necha bor buzganiga qaramay, uning internetdagi xatti-harakatlarini jilovlay olmaganlikda aybladi.
Da’vogar misol sifatida Maskning 2020 yil 1 maydagi tvitini keltirdi. «Tesla aksiyalarining narxi, menimcha, juda baland», — deb yozgan tadbirkor. Shundan keyin kompaniya aksiyalarida bir kun ichida 15 milliard dollar tushish kuzatilgan.
Manba: aniq.uz